Isang makulay at masayang pagdiriwang sa Pilipinas ang tuwing Mayo ang Santakrusan. Ginaganap ito kung gabi sa lahat halos ng lugar sa kapuluan. Binubuo ito ng mga sagala at ang tampok na Reyna Elena. May dalang krus ang Reyna Elena at kasama niya bilang konsorte si Prinsipe Constantino, na kinakatawan ng isang batang lalaki. Hindi kumpleto ang prusisyon kapag walang musiko at mga taong tumatanglaw sa mga sagala. Inaawit and "Dios Te Salve" habang daan bilang papuri sa Mahal na Birhen. Pinag-aagawan ang pabitin pagkatapos ng prusisyon. Mga walis, bunot, basket, kendi, bola, pinya, dikin, at iba-iba pa ang inilalagay sa pabitin. Nagkakaroon din ng mga palaro tulad ng palo-sebo at pagpalo sa palayok pagkatapos ng prusisyon. Idinaraos ang Santakrusan bilang pasasalamat sa mga biyayang ibinigay ng Diyos gayundin sa pag-alaala sa paghahanap ni Reyna Elena sa Mahal na Krus na pinagpakuan kay Kristo.
