Ang kanyang malungkot na paglalakbay na hindi na matanaw
Una sa dami ng aking kilala taglay ang di-mabigkas na pangarap
‘Di maipakitang pagmamahal
At kahit pagkaraan ng maraming pagsubok
Sa gitna ng nagaganap na usok sa umaga
Maniwala’t di panghihina at pagbagsak!
Ano ang naiwan!
Mga naikuwadrong larawang guhit, poster at larawan,
Aklat, talaarawan at iba pa
Wala nang dapat ipagbunyi.
Ang masaklap na pangyayari, nagwakas na
Sa pamamagitan ng luha naglandas ang hangganan, gaya ng paggunita
Ang maamong mukha, ang matamis na tinig, ang halakhak
At ang ligayang di-malilimutan.
Pema, ang immortal na pangalan
Mula sa nilisang tahanan
Walang imahe, walang anino at walang katawan
Ang lahat ay nagluksa, ang burol ay bumaba,
ang bukid ay nadaanan ng unos.
Malungkot na lumisan ang tag-araw
Kasama ang pagmamahal na inialay
Ang isang anak ng aking ina ay hindi na makikita
Ang masayang panahon ng pangarap.
Gawain 1.1 Mga Tanong Sagutin ang mga tanong tungkol sa tulang binasa. 1. Ano ang mensahe ng tulang binasa? 2. Ano-ano ang mga simbolismo o pahiwatig na ginamit? 3. Paano ipinadama ng may akda ang labis niyang pagdadalamhati sa tula? 4. Ano ang gagawin mo kung sakaling mawalan ka ng mahal sa buhay? 5. Bakit mahalaga na ipadama sa mga taong namatay ang ating pagmamahal sa kanila?
