Answer:
Usap-usapan. Hindi maalis sa bibig ng karamihan. Itong asignaturang Filipino, aalisin na raw sa kolehiyo. Kanya-kanyang pagtatanggol at suhestyon. Iba’t ibang paniniwala’t opinyon. Ilang taon ng isyu sa bansang perlas ng silangan. Tama nga kayang alisin ang Filipino sa kolehiyo o dapat nga bang ipagpatuloy pa ang pagtuuro nito?
Naging maingay ang dating tahimik na daloy ng tubig mula ng inilabas ng Komisyon sa Mas Mataas na Edukasyon ang kautusan bilang 20, taong 2013. Alinsunod dito, aalisin na ang Filipino bilang asignatura sa Pangkalahatang Kurikulum sa Edukasyon sa Kolehiyo na agad tinutulan ng mga guro, estudyante at mga organisasyon.
“Bata pa ang wikang pambansa at hindi pa ito ganap na intelektwalisado o nagagamit sa iba’t ibang larangan,” ayon kay G. David San Juan, propesor sa Filipino sa DLSU. Sa ibang salita, paano magiging intelektwalisado ang wikang Filipino kung hindi ito pag-aaralan sa mataas na paaralan? Nakasaad pa sa ating konstitusyon na dapat pagyamanin at palaganapin ang Filipino bilang wikang pambansa.
Ang pag-alis ng Filipino sa kolehiyo ay mas magdudulot pa ng kolonyal na kaisipan. Maging ang karamihan sa mga asignatura mula elementarya at sekundarya ay nakasulat sa wikang Ingles gayong maaari naman itong isalin sa Filipino katulad ng Home Economics, Music, Philippine Politics and Governance, Understanding Culture, Society and Politics at iba pa. Dagdag pa rito, hindi pa bihasa ang karamihan sa mga estudyante sa paggamit ng Filipino katulad ng paggamit ng panlapi, tamang bantas, pagkakaiba ng ‘ng’ at ‘nang’ at iba pa. Ang mga isyu sa bansa, kultura at pulitika ay mas mainam din na Filipino ang gamiting wikang panturo upang mas maging makabayan ang sistema ng edukasyon. "Upang maging ganap ang intelektwalisasyon nito, nararapat lamang na pagbutihin at palawakin pa ang pagtuturo nito sa lahat ng antas, lalo na sa kolehiyo," ani San Juan.
Ayon naman kay Atty. Julito Vitriolo, punong tagapamahala ng Komisyon sa Mas Mataas na Edukasyon, "Yung pag-aaral ng Filipino, nandoon na sa senior high school, kasi kung titingnan natin, kalahati ng general education, dinownload sa K to 12." Kaya raw inalis na sa kolehiyo ang asignaturang Filipino ay dahil inilapat ito sa ika-11 at ika-12 baitang sa senior high school. Sa usaping pagmamahal sa wika, "Dapat ang importante diyan, maging bihasa ka, mahalin mo, itaguyod at tangkilikin mo. Iyong pag-aaral kasi at pagtataguyod, nasa kahit anong level kasi," paliwanag niya. Dagdag pa rito, gusto raw ng komisyon na pagtuonang-pansin ang mga pangunahing asignatura ng kurso sa kolehiyo upang mas malinang ang mga estudyante sa tatahakin nitong karera.
Nangunguna ang Alyansa ng mga Tagapagtanggol ng Wikang Filipino o Tanggol Wika sa mga tumututol sa kautusang ito kaya naghain sila ng petisyon sa Korte Suprema upang ito’y rebisahin. Dininig naman nila ang petisyong ito sa pamamagitan ng paglabas ng pansamantalang pagpigil (temporary restraining order) sa kautusan ng komisyon. Hanggang ngayon, hindi pa tapos ang pagtatalakay dito ng mga mahistrado kaya umaasa ang mga makabayang Pilpino na panigan ng Korte Suprema ang inihaing petisyon ng Tanggol Wika.
Ang pag-aaral ng wikang Filipino ay nakadadagdag ng pagmakabayan ng bawat isa. Habang patuloy itong inaalam at sinasaliksik, lumalawak ang kaalaman ng bawat mamamayan patungkol dito na isa sa magiging dahilan upang maging intelektwalisado na ang pambansang wika. Ngunit paano ito mangyayari kung aalisin ang asignaturang Filipino sa kolehiyo?
"Laging nakayuko ang ating mga ulo dahil pinatanggap sa atin na mas mababang klase ang mga Filipino. Kailangang kilalanin na ang malaking dahilan bakit may [ganitong] problema, ay ang ating kolonyal na pinanggalingan,” ani pambansang artist para sa literatura, Bienvenido Lumbera.
Ikaw, pabor ka ba sa pag-alis ng asignaturang Filipino sa kolehiyo dahil sapat na raw ang pag-aaral nito hanggang ika-12 baitang? O naniniwala ka na dapat ipagpatuloy ang pag-aaral sa wika upang mas maging intelektwalisado ito?
