Narito ang tatlo sa mga mahahalagang kampanya ng ating pamahalaan: Kampanya para sa lahat Ang kampanya laban sa pananakit ng mga hayop (Animal Welfare Act of 1998) ay mas pinairal upang mapangalagaan ang mga hayop na may buhay rin tulad ng tao. Kung paano ingatan ng tao ang kaniyang sarili ay gayundin sana maingatan ng mga tao ang mga hayop sa lahat ng pagkakataon. Inaasahan ang bawat isa sa atin ng irespeto ang anumang nilalang, maliit man o malaki. Maituturing na kapamilya ang mga alagang hayop na madalas ay may pagkakataong naililigtas pa ang tao sa kapahamakan. Naging isang matunog na balita ang tungkol sa mahigpit na pagbabawal na paninigarilyo sa loob at labas ng mga pampublikong lugar. Ito ay nasasaad sa Executive Order 26 ni Pangulong Rodrigo Roa Duterte. Ang programang mapangalagaan ang kalusugan ng mamamayan laban sa masasamang epekto ng sigarilyo ay binibigyang pansin ng pamahalaan. Tayong lahat ay hinihikayat na tumalima o sumunod sa utos na ito. Katungkulan natin na lumahok sa kampanya laban sa paninigarilyo. Ang kampanya para sa kapayapaan ay isa ring prayoridad na dapat maisakatuparan. Sa simpleng paraan, ang pamahalaan din natin ay nakikipag-ugnayan at nakikipagkaibigan sa maraming bansa para sa kaunlaran at kapayapaan. Bilang mag-aaral naman, sana ay hindi tayo ang nagiging sanhi ng gulo at hindi pagkakaunawaan sa paaralan o tahanan. Sagutin nang may katapatan: (5 puntos bawat isa) 1. Paano ka makalalahok sa mga kampanya at programa ng pamahalaan kung tungkol ito sa (a) pagpapanatili ng kapayapaan? 2. Bakit kailangan mong makilahok, sumali at makibahagi sa mga kampanya at programa para sa pagpapatupad ng ating mga batas?
