Answer:
Pinakahuluganan ng diksyunaryo ang isang "Hudyo" na "isang miyembro ng tribu ni Judah," "isang Israelita," "isang miyembro ng isang bansa na lumitaw sa Palestina noong ika-anim na siglo B.C . hanggang unang siglo A.D.," isang tao na kabilang sa pagpapatuloy ng lahi o kabilang sa sinaunang lahi ng mga Hudyo," at "isang tao na kabilang sa relihiyong Judaismo."
Ayon sa rabinikal na Judaismo, ang isang Hudyo ay isang tao na may ina na isang Hudyo o isang tao na pormal na nakabilang sa pananampalatayang Judaismo. Laging binabanggit ang Levitico 34:10 upang patunayan ang pagpapakahulugang ito, bagama't hindi ito partikular na binabanggit sa Torah. May ilang Rabbi (guro ng Judaismo) na nagsasabi na ang pagiging Hudyo ay walang kinalaman sa paniniwala ng isang indibidwal. Sinasabi nila na hindi kailangang maging tagasunod ng mga kaugaliang Hudyo o sumang ayon sa batas ng mga Hudyo ang isang tao upang maituring na isang Hudyo. Ang totoo, ang isang Hudyo ay maaaring walang paniniwala sa Diyos ngunit maituturing pa rin na isang Hudyo ayon sa interpretasyon ng ibang mga Rabbi.
May ibang mga guro ng Judaismo na nagsasabi na malibang sundin ng isang tao ang mga katuruan ng Torah at tanggapin ang "labintatlong Prinsipyo ng Pananampalataya" ng mga Maimonides (katuruan ni rabbi Moseh ben Maimon, isa sa mga pinakadakilang iskolar ng mga Hudyo), hindi siya maaaring maging isang Hudyo. Kahit na ang isang tao ay kabilang sa lahing Hudyo, malibang sundin niya ang "labintatlong Prinsipyo ng Pananampalataya," wala siyang kaugnayan sa Judaismo.
Sa Torah - sa unang limang aklat ng Bibliya - itinuturo ng Genesis 14:13 na si Abraham ang itinuturing na unang Hudyo na inilarawan bilang isang "Hebreo." Ang pangalang "Hudyo" ay nagmula sa pangalan ni Judah na isa sa labindalawang anak ni Jacob at isa sa labindalawang tribu ng Israel. Waring ang pangalang "Hudyo" ay orihinal na tumutukoy para lamang sa mga miyembro ng tribu ni Judah, ngunit ng mahati ang kaharian ng Israel pagkatapos ng paghahari ni Solomon (1 Hari 12), ang katawagang ito ay tumukoy na sa sinumang kabilang sa kaharian ng Judah na binubuo ng mga tribu ni Judah, Benjamin at Levi. Sa ngayon, maraming naniniwala na ang isang Hudyo ay sinumang tao na nanggaling sa lahi ni Abraham, Isaac at Jacob saan mang tribu siya ng Israel nanggaling.
