Gawain 7 . Opinyon Mo Mahusay! Sa puntong ito, lubos mo nang naunawaan ang ating aralin. Ngayon naman, gamit ang mga pang-ugnay, suriin at maglahad ka ng mga opinyon mo tungkol sa sumusunod na editoryal. Gawin mong basehan ang pamantayan sa ibaba. EDITORYAL Mayroon na namang bagong COVID variant – ang “MU” o B.1.621 na unang nakita sa Colombia noong Enero ng taong kasalukuyan. Ayon sa World Health Organization (WHO), itinuturing na “variant of interest” ang “MU” na umabot ng 39 na porsyento ang paglaganap sa Colombia. Sa kasalukuyan nakita ang “MU” sa South Africa at Europe. Ayon pa sa WHO, minomonitor nila ang “MU” sapagkat ang variant ay may mga mutation na nagpapakitang lumalaban sa mga bakuna. Kailangan pa ang karagdagang pag-aaral sa nasabing variant. “. Hindi pa humuhupa ang bangis ng Delta variant ay mayroon na namang nagbabantang manalasa. Kinumpirma naman ng Department of Health (DOH) ang presensiya ng Delta variant sa maraming bahagi ng bansa. Una itong nanalasa sa India noong Mayo na marami ang namatay. Sunod na nanalasa sa Indonesia na marami rin ang naging biktima. Sa kasalukuyan, mahigit dalawang milyon na ang kaso ng COVID sa Pilipinas. Halos isang linggo nang mataas ang kaso bawat araw. Pinakamataas ang kaso noong Lunes na umabot sa 22,366. Ito ang pinakamataas na bilang na naitala mula nang manalasa ang pandemya noong nakaraang taon. Kahapon, nakapagtala ang DOH ng 20,310 na kaso ng COVID. Sabi ng OCTA Research Group maaaring tumaas pa ang kaso sa mga susunod na linggo kaya inirerekomenda ang dalawa o tatlong linggong lockdown. Pero sabi ng Malacañang, hindi na kailangan ang lockdown sapagkat marami ang magugutom. Habang patuloy ang pagtaas ng kaso, nagbabanta ang bagong variant kaya nararapat i-monitor ito ng DOH. Maghigpit na bago pa man makapasok sa bansa. Marami nang kapalpakan ang DOH na kung kailan nakapasok na saka maghihigpit. Kung kailan may nakapasok na saka ititigil ang mga flight at isasara ang border. Matuto na sa mga karanasan. Huwag nang paramihin ang problema. Hilahod na ang bansa sa kaka-lockdown at dapa na ang ekonomiya. Marami na ang nagugutom.
